"ეს ვიდეო როდისაა ჩაწერილი, ინსულტამდე თუ ინსულტის მერე?" - ამის შესახებ მიხეილ სააკაშვილის ადვოკატი ნიკა გვარამია მის უკვე ყოფილ მკურნალ ექიმ, ნინო გოგორიშვილთან დაკავშირებით წერს და ეხმაურება გავრცელებულ ვიდეოს, სადაც გოგორიშვილი საკუთარ ჯანმრთელობის მდგომარეობასთან დაკავშირებით საუბრობს. 

ეს ვიდეო როდისაა ჩაწერილი, ინსულტამდე თუ ინსულტის მერე? ჯერ "თავი წაიქცია" და სიმულაციამ რომ არ გაჭრა, ახლა მოწოდებებით მოგვმართავს, რა უნდა ვთქვათ და რა არა.
მესამე პირის განცხადების გამო (სხვა საკითხია, რა ტყუილებშია გახლართული და რას ბოდავს), პაციენტს მკურნალობაზე უარს ვეუბნებიო, აცხადებს ექიმი, რომელიც აქამდე სააკაშვილის "რეაბილიტაციით" იყო დაკავებული. ახლა მაინც ხომ გასაგებია, რომ არავითარი რეაბილიტაცია ამ ანტიექიმის მეთვალყურეობით ვერ მოხდებოდა და არც მომხდარა?
ახლა ხომ ხედავს ყველა ამ სიტუაციას მთელ შემზარაობას? - ამის და ამაზე უარესების ხელშია გამოკეტილი სააკაშვილი და ესენი წყვეტენ მის სიკვდილ-სიცოცხლის საკითხს. შეგახსენებთ, ამ დეგრადირებულმა ადამიანმა სააკაშვილის გამოწერაზე და ფორმა ასზე ხელმოწერით ერთხელ უკვე სასიკვდილოდ გაიმეტა სააკაშვილი.
ps ძალადობენ, ძალით ალაპარაკებენ და ფრჩხილებს ქვეშ ნემსებს ურჭობენ და მაგიტომ ამბობს ამას - ასეთი არგუმენტები არ მაინტერესებს. მაგ არგუმენტებით სააკაშვილის სასიკვდილო განაჩენს რომ მოაწერა ხელი, იმის გამართლებაც შეიძლება., - წერს ნიკა გვარამია.