ჩინეთის სამედიცინო სფეროს წარმომადგენლების ცნობით, იაპონიაში გრიპის ახალი შტამების სამკურნალოდ შექმნილი წამალი კორონავირუს COVID-19-ის წინააღდეგ ეფექტიანი გამოდგა. ინფორმაციას ამის შესახებ The Guardian იაპონურ მედიაზე დაყრდნობით ავრცელებს.
ჩინეთის მეცნიერებისა და ტექნოლოგიის სამინისტროს წარმომადგენლის, ჟანგ ქსინმინის ცნობით, ფავიპირავირმა (ვირუსული რნმ-პოლიმერაზას კიდევ ერთი ინჰიბიტორი), რომელიც ფუჯიფილმის შვილობილ კომპანია Fujifilm Toyama Chemical-ში გამოიგონეს, ვუჰანსა და შენჟენში 340 პაციენტზე ჩატარებული კლინიკური ტესტირებისას იმედისმომცემი შედეგები აჩვენა.
“მას აქვს უსაფრთხოების მაღალი მაჩვენებელი და ცალსახად ეფექტიანია მკურნალობისას”, – განაცხადა ქსინმინმა ჟურნალისტებთან საუბრისას.
პაციენტები, რომელებმაც მედიკამენტი მიიღეს, საშუალოდ, 4 დღეში გამოჯანმრთელდნენ, განსხვავებით იმ ადამიანებისგან, ვინც მედიკამენტი არ მიიღო. მათ გამოჯანმრთელებას, საშუალოდ, 11 დღე დასჭირდა.
გარდა ამისა, რენტგენის აპარატმა პაციენტების 91%-ში ფილტვების მდგომარეობის მკვეთრი გაუმჯობესება დაადასტურა მას შემდეგ, რაც აღნიშნული პრეპარატის მიღება დაიწყეს. რაც შეეხება იმ პაციენტებს, რომლებიც აღნიშნულ წამალს არ იღებდნენ, მხოლოდ 62%-ის შემთხვევაში გაუმჯობესდა მდგომარეობა.
აღნიშნული მედიკამენტი ცნობილია “ავიგანის” სახელწოდებითაც და მას იაპონელი ექიმები კლინიკური ცდების ფარგლებში იყენებენ მსუბუქი და საშუალო სიმძიმის სიმპტომების მქონე პაციენტებში, რათა ხელი შეუშალონ ვირუსის გამრავლებას. იაპონელი ექიმების განმარტებით, პაციენტებს, რომელთაც შედარებით მძიმე სიმპტომები აქვთ, პრეპარატის მიღების შემდეგ არც თუ ისე კარგი მაჩვენებელი აქვთ. პრაქტიკამ აჩვენა, რომ როდესაც ადამიანის ორგანიზმში ვირუსი უკვე ძლიერ არის გავრცელებული და შესაბამისად, სიმპტომებიც მძიმეა, აღნიშნულ პრეპარატს ეფექტი არ აქვს.
იაპონიის მთავრობამ აღნიშნული პრეპარატი 2016 წელს ებოლას ვირუსის წინააღმდეგ გვინეაში გამოიყენა.
ჩინეთში ფავიპირავირის კორონავირუსის საწინააღმდეგო მედიკამენტად დამტკიცებას სახელმწიფო თანხმობა სჭირდება და ეს შესაძლოა, მაისის დასაწყისში მოხდეს, თუ კლინიკური გამოცდის შედეგები ამ დროისათვის უკვე მზად იქნება.