"კოვიდის ვაქცინები, როგორც ახალი, ისე ძველი ტექნოლოგიებით დამზადებული, წინასწარი კვლევებით, თეორიული ანალიზით და პრაქტიკული ექსპერიმენტებით, არ იწვევენ ADE (ანტისხეულებით განპირობებული დაავადების გაძლიერების) რეაქციას", - ამის შესახებ "საქართველოს ჯანდაცვის ჯგუფის" კლინიკური დირექტორი გრიგოლ ხურციძე სოციალურ ქსელში წერს და ამ საკითხზე გავრცელებულ არასწორ ინფორმაციებს ეხმაურება.

წერს, რომ სანამ ანტივაქსერები ამ თეორიულ საკითხს ეჭიდებიან, რომელიც იყო გათვალისწინებული, გამოცდილი და დღემდე დაკვირვებაშია, დაღუპული ადამიანების 99% აუცრელია.

"ვისაც არ სჯერა, ვეპატიჟები ჩვენი რეანიმაციების შემოვლებზე. აუცრელები იყენებენ დღეს ჰოსპიტალური რესურსის 99%-ს და შესაბამისად, ვინც აიცრა და აქვს სხვა პრობლემა (გულსისხლძარღვთა, ქირურგიული, ა.შ) უკავებენ ადგილს, სამედიცინო პერსონალსა და მკურნალობას. ეს ხალხი იღუპება და პასუხისმგებლობა უნდა აიღონ არავაქცინირებულებმა მაშინ", - წერს ხურციძე და ანტივაქსერებს მოუწოდებს, "არაკომპეტენტური ინფორმაციის გავრცელების და პროპაგანდის მაგივრად, გამოიჩინონ საზოგადო პასუხისმგებლობა".

"მაშინ შემოგვიერთდნენ მოხალისეებად თავისნაირი იდეური და პრინციპული ანტივაქსერების რეანიმაციებში დამხმარე მოხალისეებად. წინა მოწოდებაზე ერთიც არ გამომხმაურებიხართ, აი, არც ერთი! სამედიცინო პესონალმა აქეთ ვიომოთ და იქიდან თქვენ თეორიული ჰიპოთეზების ქადაგებით სეირს უყურებდეთ, უკვე აღარ გამოვა.

პირდაპირ გეკითხებით, როცა დადგება არჩევანი და უკვე ძალიან ახლოსაა, როგორ განვასხვავო და პირველი ვინ დავსვა ხელოვნური სუნთქვის აპარატზე: ა) ადამიანი, რომელმაც არ გამოიყენა ვაქცინა და მისი 99%-იანი შანსი არ მოხვედრილიყო კოვიდით რეანიმაციაში, თუ ბ) აცრილი, რომელიც მწვავე გულის უკმარისობითაა შემოსული და აპარატი მისთვის აღარ მაქვს.

თქვენი არჩევანის თავისუფლება, სხვისი ჯანმრთელობის ფასი რატომ უნდა ღირდეს?

P.S აქ კაკუნს და თეორიულ წიაღსვლებს ნუ შემომთავაზებთ, გელით ხალათით, ნიღბით, ხელთათმანებით და დაღლილი სამედიცინო პერსონალით ისევ თქვენივე რწმენის და კრიტიკულად მძიმედ დაავადებული ადამიანების რეანიმაციებში დასახმარებლად", - წერს ხურციძე.