რუსეთის საგარეო საქმეთა სამინისტროში განაცხადეს, რომ "ყირიმის პლატფორმაში" ცალკეული ქვეყნების, საერთაშორისო ორგანიზაციებისა და მათი წარმომადგენლების მონაწილეობას "რუსეთის ფედერაციის ტერიტორიულ მთლიანობაზე შეტევად" განიხილავენ.
როგორც საგარეო უწყების ოფიციალურმა წარმომადგენელმა მარია ზახაროვამ განაცხადა, "ყირიმის პლატფორმაში მონაწილეობა უცილობლად სათანადოდ აისახება რუსეთთან ურთიერთობებზე".
ამასთან, რუსული მხარე არ იღებს "ყირიმის პლატფორმის" სამიტის მოწოდებას ამ პლატფორმაში მოსკოვის ჩართვის თაობაზე.
"მისი ცინიკუკური ანტირუსული ხასიათის გამო ამ პოლიტიკურ პლატფორმაში მონაწილეობის შესაძლებლობას ვერ ვხედავთ", – განაცხადა ზახაროვამ.
ორშაბათს კიევში უკრაინის ისტორიაში ყველაზე მასშტაბური სამიტი – "ყირიმის პლატფორმა" გაიხსნა. მასში მონაწილეობის მიზნით კიევში 45 ქვეყნის (ევროკავშირისა და ნატო-ს ყველა წევრი სახელმწიფოს) წარმომადგენლები, 14 ქვეყნის ლიდერები (10 პრეზიდენტი და 4 პრემიერ-მინისტრი), პარლამენტების სპიკერები, საგარეო საქმეთა, თავდაცვის, ენერგეტიკის მინისტრები და ელჩები ჩავიდნენ.
"ყირიმის პლატფორმა" მოწოდებულია, ყირიმის დეოკუპაციისა და უკრაინის შემადგენლობაში დაბრუნების მიზნით საერთაშორისო ძალისხმევის კოორდინაციას შეუწყოს ხელი.