"გვაქვს შანსი, პირველივე ტურში გლდანმა გამოაცხადოს გამარჯვება" - ნიკა მელია
გაერთიანებული ოპოზიციის მერობის კანდიდატი ნიკა მელია და საკრებულოს თავმჯდომარეობისა და გლდანის მაჟორიტარობის კანდიდატი, ელენე ხოშტარია გლდანში ამომრჩეველს შეხვდნენ. ნიკა მელიამ გლდანის მოსახლეობას ელენე ხოშტარია წარუდგინა.
"ელენესნაირი ენერგიული და კომპეტენტური დეპუტატი და შემდეგ საკრებულოს თავმჯდომარე სჭირდება გლდანის რაიონს. ელენე ხოშტარია დამაჯერებლად გაიმარჯვებს პირველივე ტურში გლდანის რაიონში და ელენე ხოშტარია იქნება მაჟორიტარი დეპუტატი გლდანის რაიონიდან და ეს ყველაფერი სჭირდებათ მუხიანელებსაც, ავჭალელებსაც და გლდანელებსაც. ელენესნაირი ენერგიული დეპუტატი და შემდეგ საკრებულოს თავმჯდომარე, სჭირდება გლდანის რაიონს ქომაგად. ამიტომ, წარმატებები ელენეს და წარმატებები მთელს გლდანის რაიონს",- თქვა ნიკა მელიამ.პირველ ტურში გამარჯვებაში დარწმუნებულია, გლდანის მაჟორიტარობის კანდიდატი, ელენე ხოშტარიაც. როგორც მან აღნიშნა, გლდანმა 2020 წლის არჩევნებზე დიდი ბრძოლისუნარიანობა აჩვენა.
"ჩემთვის მნიშვნელოვანია, რომ სიის პირველი ნომერი კი არ ვიყო, არამედ, უშუალოდ ვიყო ამ მებრძოლ ხალხთან ერთად და ამ უბანში დავდოთ გამარჯვების კიდევ ერთი მაგალითი და ჩვენ რეალურად გვაქვს შანსი, რომ პირველივე ტურში გლდანმა გამოაცხადოს გამარჯვება",- თქვა ელენე ხოშტარიამ.