დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, იმ შემთხვევაში, თუ სწავლის განახლების პერიოდში, ეპიდსიტუაცია ისევ მძიმე იყო, NCDC სწავლის დაწყებაზე რეკომენდაციას ვერ გასცემს. გამყრელიძის განმარტებით, ახლა ინფიცირების დადებითობის მაჩვენებელი 10%-ია და თუ სექტემბრისთვის 4%-ს ჩამოსცდება, სწავლის განახლების საკითხი, სასწავლო დაწსებულებებში, დღის წესრიგში დადგება.

"თუ ამ ტიპის ეპიდსიტუაცია იქნა სექტემბრის 15-ისთვის, როცა სწავლა უნდა დაიწყოს, დაავადებათა კონტროლის ცენტრი რეკომენდაციას ვერ გასცემს სწავლის დაწყებასთან დაკავშირებით. ჩვენ ველით, რომ ამ შეზღუდვებმა, რომელიც ახლა შემოვიტანეთ, აცრების ინტენსიფიკაციამ, სერიოზულად უნდა შეამციროს ახალი შემთხვევების მაჩვენებელი ქვეყანაში. დღეს დადებითობის მაჩვენებელი გვაქვს 10%-ის ფარგლებში, თუ ჩამოვიდა 4%-ს დაბლა, მაშინ დადგება საკითხი სწავლის განახლების შესახებ",-თქვა ამირან გამყრელიძემ.

ცნობისთვის, ბოლო პერიოდში კორონავირუსის ინფიცირების მაჩვენებელი პიკს აღწევს და ყოველდღიურად ანტირეკორდებს ხსნის. დიდია გარდაცვალების მაჩვენებელიც.
დღეს, 17 აგვისტოს, საქართველოში ვირუსის 6 208 ახალი შემთხვევა გამოვლინდა, გასული დღე-ღამის განმავლობაში 42 ადამიანი გარდაიცვალა.