საგარეო საქმეთა მინისტრი, დავით ზალკალიანი ისევ ამბობს, რომ სახელმწიფო ყველა არსებულ და სხვა ფორმატის ბერკეტებს იყენებს იმისთვის, რომ ოკუპანტების ტყვეობაში მყოფი ზაზა გახელაძე უკან დააბრუნონ. მისივე განცხადებით, ოჯახმა ამის შესახებ იცის.

"ოჯახმა რა თქმა უნდა იცის საგარეო საქმეთა სამინისტროს მხრიდან განხორციელებული ყველა კონკრეტული ქმედების შესახებ. არ დარჩენილა არცერთი უმაღლესი ტრიბუნა, საერთაშორისო ფორმატი, ორმხრივი ურთიერთობის ფორმატი სადაც ჩვენ ზაზა გახელაძის საკითხი არ ყოფილიყო წამოწეული განსაკუთრებული სიმწვავით. ყველა ტრიბუნას, ყველა ფორმატს ვიყენებთ იმისთვის, რომ ზაზა გახელაძის თემა იყოს უმთავრესი", - თქვა დავით ზალკალიანმა.

მისივე თქმით, საზოგადოებამ უნდა გაითვალისწინოს, რომ საქმე ოკუპანტ ქვეყანასთან გვაქვს, რომელიც არ ითვალისწინებს საერთაშორისო სამართლის ნორმებს. ზალკალიანი დაგეგმილ აქციებსაც გამოეხმაურა და თქვა, რომ სუს-ი ჩართულია, რათა პროვოკაცია არ მოხდეს.

"ძალიან აქტიურად არის ჩართული ჩვენი უსაფრთხოების სამსახურები, რომ ამ რაღაც აქციებმა, რომელიც დაგეგმილია, რაიმე პროვოკაცია არ გამოიწვიოს. იმიტომ, რომ პროვოკაციამ შესაძლოა მისცეს ასე ვთქვათ შემდგომი ზემოქმედების, ცუდად განვითარების შესაძლებლობა ოკუპანტს ქვეყანასთან, გამოიყენონ ეს პროვოკაცია მათი მიზნებისთვის, იმიტომ, რომ არ მოხდეს გათავისუფლება", - თქვა მან.