ღვინის ქურდები გაგვიგია, ხმის ქურდებიც გვინახავს, მაგრამ აი, ოლქის ქურდებიც თუ გამოჩნდებოდნენ, არ გვეგონა, - ამის შესახებ ფრაქცია „ნაციონალური მოძრაობის" თავმჯდომარე რომან გოცირიძემ ჟურნალისტებს განუცხადა, რითაც გამოეხმაურა ახალი საარჩევნო მოდელით ოლქების შესაძლო გადანაწილებას. მისი თქმით, მმართველი პარტია ცდილობს, თბილისში 1 ოლქი მოიპაროს.
„სამუშაო გასაგრძელებელია, მათ შორის ოლქებთან დაკავშირებით. უკვე არის მცდელობა ოლქების საკუთარ თავზე მორგებისა. ღვინის ქურდები გაგვიგია, ხმის ქურდებიც გვინახავს, მაგრამ აი, ოლქის ქურდებიც თუ გამოჩნდებოდნენ, არ გვეგონა. აი, უნდათ, რომ თბილისში მოიპარონ ერთი ოლქი და დიდი თბილისი გაყონ 7 ოლქად, ნაცვლად 8 ოლქისა. ეს ჯერჯერობით მათი შიდა მოსაზრებაა. საბოლოო ჯამში, პარტიები შევთანხმდებით და ოლქებიც განაწილდება საკონსტიტუციო სასამართლოს მოთხოვნის და ვენეციის კომისიის რეკომენდაციის შესაბამისად,"- განაცხადა გოცირიძემ.
მისივე თქმით, საარჩევნო ბლოკებთან დაკავშირებით პოზიცია ჯერ ჩამოყალიბებული არ არის.
„ბლოკების შესახებ იმსჯელებენ პარტიები და შემდეგ გვექნება პოზიცია. ჩვენ განსაკუთრებული მოსაზრება ამასთან დაკავშირებით არ გვაქვს და მხარს დავუჭერთ იმ მოსაზრებას, რომელიც გამოხატავს პოლიტიკური პარტიების უმრავლესობის სურვილსა და ინტერესს“, - განაცხადა გოცირიძემ.