საქართველოსა და უკრაინის პრემიერმინისტრებს შორის შეხვედრა დასრულდა. შეხვედრის დასრულების შემდეგ, ირაკლი ღარიბაშვილმა და დენის შმიგალმა კომენტარი მედიასთან გააკეთეს.
როგორც ირაკლი ღარიბაშვილმა აღნიშნა, მხარეებმა შეხვედრაზე საქართველო-უკრაინის ურთიერთობები, ამ ორი ქვეყნის ევროკავშირისკენ სწრაფვის, NATO-ში ინტეგრაციისა და სავაჭრო-ეკონომიკური თემები განიხილეს.
ღარიბაშილმა უკრაინის პრემიერს საქართველოში ვიზიტისთვის მადლობა გადაუხადა.

"ჩვენ გვაქვს აბსოლუტურად ყველა მექანიზმი, ყველა ძლიერი ფუნდამენტი იმისთვის, რომ კიდევ უფრო მეტად გავაძლიეროთ ჩვენ შორის არსებული ისედაც ძალიან ძლიერი ურთიერთობები და კიდევ უფრო მეტად გავაძლიეროთ ჩვენი ორმხრივი თანამშრომლობა და პარტნიორობა",-თქვა ღარიბაშილმა.

უკრაინის პრემიერმინისტრმა საქართველოს დამოუკიდებლობის დღე კიდევ ერთხელ მიულოცა და ქართველ ხალხს მშვიდობა, კეთილდღეობა და ურთიერთშეთანხმება უსურვა.
საუბრისას შმიგალმა ასევე აღნიშნა, რომ ევროკავშირსა და ნატოში ქვეყნების გაწევრინება მხოლოდ დროის საკითხია.

"უკრაინა და საქართველო სტრატეგიული პარტნიორები არიან და ეს არ არის მხოლოდ სიტყვები, ეს დასტურდება კონკრეტული საქმეებით, ფაქტებით და რა თქმა უნდა, ჩვენ პარტნიორობით. დღევანდელი ურთიერთობები ჩვენს ქვეყნებს შორის ემყარება პირველ რიგში ერთობლივ მიზნებს, რაც არის უკრაინისა და საქართველოს მთავრობების ევროკავშირსა და ნატოში გაწევრიანება. დარწმუნებული ვარ, რომ ევროკავშირსა და ნატოში ჩვენი ქვეყნების შესვლა მხოლოდ დროის საკითხია. ჩვენი მხრიდან საქართველოს და უკრაინის მთავრობები ყველაფერს აკეთებენ, რომ ამისათვის საჭირო კრიტერიუმებს მიაღწიონ",-თქვა დენის შმიგალმა.