სისხლიან 9 წელზე ბევრი საუბრისას, თვითონ გახდით სისხლიანები - ნაცვლიშვილი "ოცნებას"
"ამნისტიის შესახებ" უმრავლესობის კანონპროექტს დაუსჯელობის დაკანონების კანონი ჰქვია - სისხლიან 9 წელზე ბევრი საუბრისას, თვითონ გახდით სისხლიანები და ახლა გინდათ, კვალი წაშალოთ... თქვენი ლოგიკა ასეთ რამეს ეფუძნება: - თქვენ გინდათ მთლიანად 20 ივნისი ისეთ მოვლენად წარმოაჩინოთ, რომელსაც მხოლოდ ორი მხარე ჰყავს. ამ მოვლენას სამი მხარე ჰყავს. ცდილობთ, რომ მესამე მხარე მიჩქმალოთ, მაგრამ ვერ მიჩქმალავთ! ეს მესამე მხარე ის ადამიანები არიან, რომლებიც საერთოდ არც ერთ პოლიტიკურ პარტიას არ წარმოადგენდნენ და ანტისაოკუპაციო აქციაზე საკუთარ სამშობლოს იცავდნენ. როცა სამშობლოზე სადღეგრძელოებს დალევთ, ანტისაოკუპაციო აქციაზე თქვენც მდგარიყავით - ხომ არ მოგეწონათ, როცა პარლამენტის თავმჯდომარის სკამში გავრილოვი იჯდა?! მაგრამ არც გამბედაობა და არც სხვა თვისებები გყოფნიდათ, რომ იქ დამდგარიყავით. გამბედაობა არც მაშინ გყოფნიდათ, როცა ჩეხვის ოპერაცია დაიწყო, ვინმე მაინც რომ მისულიყავით და ეს ყველაფერი გაგეჩერებინათ" - მიმართა "ლელოს" წევრმა, ანა ნაცვლიშვილმა "ქართულ ოცნებას" პარლამენტის პლენარულ სხდომაზე, სადაც 20 ივნისის მოვლენების ამნისტიის კანონპროექტის "ოცნების" ვერსია განიხილება.