ხათუნა სამნიძე უმრავლესობას - ამხელა ხელისუფლებაში მყოფ პარტიას მეტი სადარდებელი არ აქვს გარდა იმისა, როგორმე ნიკა მელიას ღირსება შეულახოს?!
ამხელა ხელისუფლებაში მყოფ პარტიას მეტი სადარდებელი არა აქვს და მთელი ენერგია მიმართულია იქეთკენ, რომ როგორმე ნიკა მელიას ღირსება შეულახოს და მისი დისკრედიტაცია მოახდინოს - მეტი პრობლემა აღარ დაიტოვეთ! - ამ განცხადებით „ქართული ოცნების“ წარმომადგენლებს პარლამენტის პლენარულ სხდომაზე, ოპოზიციონერმა დეპუტატმა ხათუნა სამნიძემ მიმართა. სამნიძემ „ამნისტიის შესახებ“ კანონპოექტზე მომხსენებელს, იურიდიულ საკითხთა კომიტეტის თავმჯდომარეს ანრი ოხანაშვილს მიმართა კითხვით, რატომ სურთ ამნისტიის თაობაზე კანონში წინასწარი თანხმობის მუხლის ჩადება. სამნიძის თქმით, აღნიშნული ჩანაწერით პრობლემა რჩება, რადგან ამნისტიაზე თანხმობასთან დაკავშირებით ნიკა მელიას პოზიცია ცნობილია.
„როგორც ჩანს, "ქართულ ოცნებას" ძალიან სურს, დოკუმენტს ინტერპრეტაციებით ამოეფაროს. ამასობაში, მიშელის დოკუმენტის ინტერპრეტაციები არაფერ შუაშია. ლაპარაკია პოლიტიკურ ნებაზე! სამწუხაროდ, „ქართულ ოცნებას“ მთელი ამ ხნის განმავლობაში მთავარ მიზნად ჰქონდა, რომ მას, ვისთვისაც მოლაპარაკებების დროს ამნისტიაზე ჩანაწერი გაჩნდა - ნიკა მელიას, რაც შეიძლება მეტი ზიანი მიაყენოს“, - განაცხადა სამნიძემ პარლამენტის პლენარულ სხდომაზე.
პარლამენტი, პლენარული სხდომის ფორმატში, 19-20 ივნისის მოვლენებთან დაკავშირებით მომზადებულ ამნისტიის პროექტს იხილავს.