მმართველი პარტია განცხადებას ავრცელებს და ოპოზიციას მოუწოდებს, რომ ხელი მოაწერონ შეთანხმების დოკუმენტს. როგორც განცხადებაში წერია, მმართველი გუნდის მხრიდან შარლ მიშელის დოკუმენტზე ხელი უკვე მოწერილია და ახლა ოპოზიციის ჯერია. მათი თქმით, დოკუმენტი "მხარეთა შორის სამართლიან შეთანხმებას ადგენს".
"ქართულმა ოცნებამ", ქვეყნის წინაშე საკუთარი პასუხისმგებლობის გაცნობიერებით, ხელი მოაწერა ამ დოკუმენტს და დამატებით გამოხატა მზადყოფნა თვითმმართველობის არჩევნებზე ნდობის 40%-იანი პრინციპის გამოყენებაზე. "ქართულმა ოცნებამ" შეთანხმების მისაღწევად არაერთი მნიშვნელოვანი კომპრომისული ნაბიჯი გადადგა. ჩვენი მხრიდან ევროკავშირის და პრეზიდენტ შარლ მიშელის ეგიდით წარდგენილ დოკუმენტზე ხელმოწერა უკვე დაფიქსირებულია. ახლა ჯერი ოპოზიციაზეა. მოვუწოდებთ ოპოზიციას, ქვეყნის ინტერესები დააყენოს ყველაფერზე მაღლა და ხელი მოაწეროს აღნიშნულ დოკუმენტს", - წერია განცხადებაში.
როგორც "ქართულ ოცნებაში" ამბობენ, "ქვეყანა უნდა იყოს გაერთიანებული საერთო გამოწვევების გარშემო, ხოლო პოლიტიკოსები ქვეყნისა და საზოგადოების წინაშე არსებული პრობლემების გადაჭრაზე უნდა მუშაობდნენ".