"ლეიბორისტული პარტია" "ქართული ოცნების" შეთავაზების საპასუხოდ აცხადებს, რომ ევროპული საბჭოს პრეზიდენტის სპეციალური წარმომადგენლის, კრისტიან დანიელსონის მედიატორობით მომზადებულ დოკუმენტს ხელს არ მოაწერს. შესაბამისად, "ლეიბორისტები" არც პარლამენტში შესვლას გეგმავენ არჩილ თალაკვაძის მიერ ოპოზიციისთვის შეთავაზებული პირობით."ლეიბორისტული პარტიის" ლიდერის, გიორგი გუგავას თქმით, მათი პარტიისთვის მიუთებელია თალაკვაძის შეთავაზება რიგგარეშე არჩევნების საკითხის თვითმმართველობის არჩევნებზე დაფიქსირებულ შედეგებზე მიბმის შესახებ და აცხადებს, რომ კრიზისს მხოლოდ ნიკა მელიას და გიორგი რურუას გათავისუფლება, ასევე, რიგგარეშე არჩევნების თარიღის დანიშვნა განმუხტავს.
"გამორიცხულია ამ პირობებით ხელმოწერა. ჩვენ ვითხოვთ რიგგარეშე არჩევნებს, პოლიტპატიმრების გათავისუფლებას და მხოლოდ ამ ფორმით არის შესაძლებელი არსებული უმძიმესი სიტუაციის განმუხტვა. თვითმმართველობაზე რაიმე ფორმით მიბმა რიგგარეშე არჩევნებისა აბსურდია, სხვა შინაარსის არჩევნებია. სანამ პოლიტპატიმრები არ გათავისუფლდებიან და რიგგარეშე არჩევნები არ დაინიშნება არ შეწყდება წინაარმდეგობის მოძრაობა. ეგ საკენკი დაუყარონ თავისებს" - ამბობს გიორგი გუგავა.