"ორჭოფობა, გადაუწყვეტელობა საკმაოდ ცუდად ახასიათებს ჩემ თვალში გიორგი გახარიას", - ასეთ კომენტარს აკეთებს, "ქართული ოცნების" დეპუტატი გია ვოლსკი ყოფილი პრემიერმინისტრის გიორგი გახარიას პოლიტიკაში დაბრუნების საკითხზე.
როგორც ვოლსკი ამბობს, მანამდე გახარიამ ბევრ შეკითხვას უნდა გასცეს პასუხი, მათ შორის იმ ეკონომიკურ პრობლემებზე უნდა აიღოს პასუხისმგებლობა, რაც ქვეყანაში არსებობს.

"რასაკვირველია, მან [გახარიამ] უნდა გასცეს პასუხი უამრავ შეკითხვას, რომელიც უკავშირდება თუნდაც ეკონომიკურ პრობლემებს, რაზეც ხშირად საუბრობდა თავად და გარკვეულ საკითხებთან დაკავშირებით ალბათ, პასუხისმგებლობაც უნდა აიღოს. პასუხი უნდა გასცეს მთავარ თემებს, რაც უკავშირდება მის გასვლას გუნდიდან, შეფასებას საზოგადოება გააკეთებს და იტყვის რამდენად ანგარიშგასაწევია", - თქვა ვოლსკიმ.

ვოლსკი ასევე ამბობს, რომ ის, როგორც ერთ-ერთი ამომრჩეველი გახარიას ხმას არ მისცემს, რადგან ის, როგორც პრემიერმინისტრი კრიტიკულ სიტუაციებში მოწოდების სიმაღლეზე ვერ იყო.

"ჩემი აზრით და მეც ერთ-ერთი ამომრჩეველი ვარ, მას ხმას არანაირად არ მივცემ, რადგან პრინციპული მომენტები არსებობს ქვეყნის ცხოვრებაში, როცა პრემიერ-მინისტრი მოწოდების სიმაღლეზე უნდა იყოს, რაც მან ვერ გააკეთა", - ამბობს ვოლსკი.