შეერთებული შტატების სახელმწიფო დეპარტამენტი, სახელმწიფო მდივნის ენტონი ბლინკენის ბრიუსელში ვიზიტის შესახებ ინფორმაციას აქვეყნებს.
ოფიციალურ ცნობაში ენტონი ბლინკენისა და ევროკავშირის უმაღლესი კომისრის შეხვედრაზეა საუბარი, სადაც მხარეებმა საქართველოს შესახებაც ისაუბრეს და განაცხადეს, რომ აშშ და ევროკავშირი მზად არიან რუსეთთან ითანამშრომლონ, თუ მოსკოვი კონფრონტაციულ მიდგომაზე უარს იტყვის.

"ენტონი ბლინკენმა და ჟოზეფ ბორელმა აღნიშნეს, რომ კოორდინირებულად უპასუხებენ რუსეთის გამომწვევ ქცევას, მათ შორის უკრაინისა და საქართველოს წინააღმდეგ აგრესიას, ჰიბრიდულ საფრთხეებს, როგორიცაა დეზინფორმაცია, ჩარევა საარჩევნო პროცესებში, მავნე კიბერსაქმიანობა და სამხედრო პოზიციონირება", - ნათქვამია სახელმწიფო დეპარტამენტის ოფიციალურ ვებგვერდზე გამოქვეყნებულ განცხადებაში.

აშშ-ის სახელმწიფო მდივანმა ენტონი ბლინკენმა და ევროკავშირის უმაღლესმა წარმომადგენელმა, ევროკომისიის ვიცე-პრეზიდენტმა ჟოზეფ ბორელმა 24 მარტს ბრიუსელში შეხვედრა გამართეს. მათ, აშშ-ევროკავშირის ურთიერთობის განმტკიცების გზები, პრიორიტეტული საგარეო პოლიტიკა, უსაფრთხოებისა და ეკონომიკური საკითხები განიხილეს.