გიორგი შაქარაშვილის განზრახ ჯგუფურად მკვლელობის საქმეზე დაკავებულ ორ არასრულწლოვანს 10 წლითა და 6 თვით პატიმრობა შეეფარდა.
 ზ.ხ.-სა და ა.ქ.-ს მოსამართლემ 14-14 წლიანი სასჯელი განუსაზღვრა თუმცა, არასრულწლოვანთა მართლმსაჯულებიდან გამომდინარე, მათ სასჯელი ერთი მეოთხედით შეუმცირდათ და საბოლოოდ,  პენიტენციურ დაწესებულებაში ისინი 10 წელსა 6 თვეს გაატარებენ.
არასრულწლოვნების განაჩენი, მცხეთის რაიონულ სასამართლოში, მოსამართლე ბიძინა სტურუამ ცოტა ხნის წინ გამოაცხადა. ზ.ხ და ა.ქ. ბრალს არ აღიარებენ.
9 მარტს, სასამართლომ გიორგი შაქარაშვილის მკვლელობის საქმეზე 5-ვე ბრალდებული დამნაშავედ სცნო. 16 წლით თავისუფლების აღკვეთა შეეფარდა არჩილ გაგნიძეს, ნიკოლოზ რევაზიშვილსა და ვახტანგ ჩიქოვანს.
საქმის არსებითი განხილვა 2 მარტს დასრულდა. მოსამართლე სათათბიროდ გავიდა, თუმცა განაჩენი არ გამოუცხადებია. 2 მარტს, სხდომაზე, მხარეებმა რეპლიკის უფლებით ისარგებლეს. საბოლოო სიტყვა 
წარმოთქვეს ბრალდებულებმა.
ახალგაზრდა ფეხბურთელი 2020 წლის 18-19 ივნისის ღამით გაუჩინარდა. ოთხდღიანი ძებნის შემდეგ, 22 ივნისს, შაქარაშვილის ცხედარი მდინარე არაგვში იპოვეს.