„მითითება იმაზე, რომ კომპრომისები უნდა გაკეთდეს, არის ძალიან მნიშვნელოვანი“, - განაცხადა პარლამენტის თავმჯდომარემ, არჩილ თალაკვაძემ ტვ „იმედის“ ეთერში ოპოზიციასთან მმართველი გუნდის მოლაპარაკებების პროცესში ევროკავშირის წარმომადგენლობის მედიაციის მნიშვნელობაზე საუბრისას. თალაკვაძის თქმით, კომპრომისი არ ნიშნავს, რომ მხოლოდ ხელისუფლებას მოსთხოვო ნაბიჯების გადადგმა.
„ოპოზიციამაც უნდა გადადგას ეს ნაბიჯები, მით უმეტეს, როდესაც ეს არჩევნები ეუთო/ოდირმაც, რესპუბლიკურმა ინსტიტუტმაც, საერთაშორისო დამკვირვებლებმაც აღიარეს, როგორც ლეგიტიმური არჩევნები. მათ გაიმეორეს საბოლოო დასკვნებში, რომ ეს იყო კონკურენტული არჩევნები, რომელიც ფუნდამენტური უფლებების დაცვით ჩატარდა, რაც ნიშნავს, რომ უკვე აპელირება იმაზე, რომ თითქოს ეს არჩევნები არალეგიტიმურია და, მოდით, ახლა, რასაც ჩვენ ვიტყვით, ის უნდა შეასრულოს ხელისუფლებამ, ეს ოპოზიციის მხრიდან არ არის სწორი მიდგომა“, -აღნიშნა არჩილ თალაკვაძემ, რომლის თქმითაც, სამართლიანი პრინციპების მიღმა, მმართველი გუნდი არ აპირებს, რაიმე შეთანხებას მიაღწიოს.
„იმიტომ, რომ პანდემიის პირობებში, ჩვენმა ორმა მილიონმა თანამოქალაქემ მიიღო არჩევნებში მონაწილეობა. როცა მოქალაქეებმა ხმა მისცეს, როდესაც დამკვირვებლებმა გააკეთეს დასკვნები უკვე ჩატარებულ არჩევნებზე, ჩვენ რა უფლება გვაქვს, რომ საზოგადოების ნაცვლად ან დამკვირვებლების ნაცვლად კონკრეტული მოლაპარაკებების დროს, ეს რაიმეში გავცვალოთ?! წარმოუდგენელია. ამიტომ ჩვენ მომავალზე ვმსჯელობთ დღეს და მომავალზე გვაქვს მოლაპარაკებები, მომავალზე გვაქვს დისკუსია,“- განაცხადა არჩილ თალაკვაძემ.
ევროპული საბჭოს პრეზიდენტის წარმომადგენელის კრისტიან დანიელსონის შეხვედრები საქართველოს ხელისუფლებისა და ოპოზიციური პარტიების წარმომადგენლებთან, რომელიც 13 მარტს მთელი დღის განმავლობაში მიმდინარეობდა, 14 მარტს, დილის 9 საათიდან განახლდა.