ატლანტიკური საბჭოს მიერ ორგანიზებულ ონლაინ კონფერენციაზე გაკეთებულ განცხადებებს სხვადასხვაგვარი შეფასებები მოჰყვა, როგორც ყოველთვის, ხელისუფლება აცხადებს, რომ საგანგაშო არაფერია და რომ საბჭოზე გაკეთებული განცხადებები მხოლოდ ქვეყნის სწორ კურსზე მიანიშნებს. ასე არ ფიქრობს ოპოზიცია. სალომე სამადაშვილი, რომელიც თავად მონაწილეობდა ონლაინკონფერენციაში, ამბობს, რომ პროგნოზები საქართველოს მომავალთან დაკავშირებით, საკმაოდ შემაშფოთებელია.

"კვლავაც საუბრობენ იმაზე, რომ საქართველოში დემოკრატიის ხარისხი დაბალია, რომ ქვეყანა მისაკუთრებულია ერთი ოლიგარქის მიერ, ხოლო ევროპელი კოლეგებიდან, მაგალითად, ბატონი პავილიონისი, პირდაპირ მოუწოდებს ვაშინგტონს, გაზარდოს წნეხი ხელისუფლებაზე. არის საუბარი იმაზეც, რომ დღის წესრიგში დადგეს სანქციების შემოღების საკითხიც", - ამბობს სალომე სამადაშვილი.

ონლაინკონფერენცია გუშინ შედგა და იქ საქართველოს შესახებაც ისაუბრეს.