ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლები ქვეყანაში მიმდინარე მოვლენებს და "ნაციონალური მოძრაობის" თავმჯდომარის, ნიკა მელიას დაკავებას ეხმაურებიან. 

"მართალია, კანონის ზემოთ არავინ უნდა იდგეს, თუმცა პოლიციის რეიდმა ნაციონალური მოძრაობის სათაო ოფისზე და ოპოზიციის ლიდერის დაკავებამ გამოიწვია დაძაბულობის არასაჭირო ესკალაცია ოპოზიციასა და მმართველ უმრავლესობას შორის, გააღრმავა პოლიტიკური კრიზისი ქვეყანაში. საქართველოს დემოკრატიულ განვითარებას სჭირდება თავშეკავება, დიალოგი და კომპრომისი და არა ესკალაცია და დაპირისპირება", - წერია ტიტუს კორლატენისა და კლოდ კერნის ერთობლივ განცხადებაში.

თანამომხსენებლები მიმართავენ ყველა პოლიტიკურ ძალას, თავი შეიკავონ მოქმედებებისგან, რომლებმაც, შესაძლოა, გამოიწვიოს დაძაბულობის შემდგომი ესკალაცია და მოუწოდებენ დაუბრუნდნენ მოლაპარაკებების მაგიდას, რათა იპოვონ მიმდინარე კრიზისის პოლიტიკური და ორივე მხარისთვის მისაღები გადაწყვეტის გზა.