ოკუპირებული აფხაზეთის დე ფაქტო პრეზიდენტობის ერთ–ერთი კანდიდატი, მოქმედი "ვიცე–პრემიერი" ადგურ არძინბა საქართველოს ცენტრალურ ხელისუფლებასთან დიალოგის წინააღმდეგია. ეს პოზიცია მან დღეს დე ფაქტო თავდაცვის სამინისტროს თანამშრომლებთან წინასაარჩევნო შეხვედრაზე დააფიქსირა.
„მოგეხსენებათ, რაოდენ დიდი მხარდაჭერა აქვს ჩვენს მტერს. ისინი დღე და ღამე აძლიერებენ თავის ჯარს. საქართველოსთან არანაირი დიალოგი არ უნდა იყოს. ის ჩვენი მტერია. დიალოგზე ფიქრიც კი დაუშვებელია. ჩვენ გვაქვს საკითხები, რომელშიც ერთობლივად ვმუშაობთ. მაგალითად ენერგეტიკა. არ ღირს სიჩქარე და მატარებლის წინ სირბილი. ვისთან უნდა ვაწარმოოთ დიალოგი? ხალხთან, რომელიც დილიდან დაღამებამდე წვრთნებს მართავს და წარმოსახვაში ატრიალებს სცენას, როგორ ჩამოვა აქ - სოხუმში?! აღიარონ ჩვენი დამოუკიდებლობა, ის კოლოსალური ზიანი, რომელიც ჩვენს ეკონომიკას მიაყენეს – და მაშინ ვისაუბროთ“, – აღნიშნა მან.