"მთავარი არხის" გენერალური დირექტორი, ნიკა გვარამია წერს, რომ აქვს ინფორმაცია, რომ 7 ოპოზიციონერი სამი პარტიიდან პარლამენტში შესვლას აპირებს. მისი განცხადებით, ცდილობენ ეს ინფორმაცია გადაამოწმონ და ოპოზიცია "ნაზი ყვავილი არაა, რომ მისთვის  კრიტიკული შეკითხვების დასმა არ შეიძლებოდეს.

"ოპოზიცია ნაზი ყვავილი არ არის, რომ მისთვის კრიტიკული შეკითხვების დასმა არ შეიძლებოდეს. მით უმეტეს, ამ ისტორიული კონტექსტის გათვალისწინებით.
არავის არ ვაგინებთ, გვაქვს ინფორმაცია ერთდროულად და იდენტური ქართული ოცნებიდან და ოპოზიციიდან, რომ 7 ოპოზიციონერი სამი პარტიიდნ აპირებს პარლამენტში შესვლას და ვცდილობთ ამ ინფორმაციის გადამოწმებას. არ ვაპირებთ ამ უმნიშვნელოვანესი ფაქტის დამალვას, გვეყო, რაც (შეცდომით) ვმალეთ შიდაოპოზიციური და ოცნებასთან მოლაპარაკებების დეტალები თითქმის ერთი თვე. ჩვენ სახალხო მედია ვართ და ვმუშაობთ ხალხისთვის და არა ვიღაცის ნამუსის შესანახად.
მოკლედ, შვიდივესთან ვამოწმებთ ინფორმაციას და შემდეგ გამოშვებაში ჩამოვთვლით შვიდივეს და მათ პასუხებს: "არ შევდივარ" ან "ამიტომ და ამიტომ შევდივარ", ან "კომენტარი არ გააკეთა", რაც ასევე პასუხია. არაა საჭირო დამუნათება, ნამუსზე შეგდება და ისტერიკები. არ მუშაობს", - წერს ნიკა გვარამია. 

შეგახსენებთ, რომ ცოტა ხნის წინ გავრცელდა ინფორმაცია, რომ პარლამენტში შესვლას შესაძლოა "სტრატეგია აღმაშენებლის" ლიდერი, გიორგი ვაშაძე, "მოქალაქეების" ლიდერი, ალეკო ელისაშვილი და "გირჩის" წევრები დათანხმდნენ, ზურა ჯაფარიძის გამოკლებით. 
ოპოზიციას გადაწყვეტილების მიღებამდე 3 დღე რჩება, რადგან პრეზიდენტმა ახალარჩეული პარლამენტის პირველი სხდომა 11 დეკემბერს უკვე ჩანიშნა.