„ქართული ოცნების“ დეპუტატ კახი კახიშვილს 13 მაისს გაკათებულ მწვავე განცხადებებთან დაკავშირებით განმარტება ამ დრომდე არ გაუკეთებია, პარტიის თავმჯდომარე ირაკლი კობახიძე კი აცხადებს, რომ თუ დეპუტატს აქვს ინტერესი, სხვადასხვა მიმართულებით უფრო აქტიურად იყოს ჩართული, მასთან კონსულტაციები შედგება.
ამასთან, კობახიძე ამბობს, რომ კახიშვილს პარლამენტის ფორმირების პროცესში ორი თანამდებობა შეეთავაზა:
„შემიძლია, საიდუმლო გაგიმხილოთ: როდესაც არჩევნების შედეგ პარლამენტი ყალიბდებოდა, მას ორი სხვადასხვა კომიტეტის თავმჯდომარეობა შევთავაზეთ, თუმცა სხვადასხვა მიზეზის გამო უარი თქვა. რაიმე ინტერესი თუ არის, რომ სხვადასხვა მიმართულებით უფრო აქტიურად იყოს ჩართული, რა თქმა უნდა, გამოცდილების მქონე გუნდის წევრია და შესაბამისად, მასთან კონსულტაციები გვექნება“.
თუმცა კობახიძის კომენტარი არ პასუხობს კახიშვილის მიერ გაჟღერებულ ძირითად პრეტენზიებს. კერძოდ, კახიშვილმა 13 მაისს „პალიტრანიუსის“ ეთერში განაცხადა, რომ როგორც მაჟორიტარს, კონკრეტული საქმის გაკეთებაში ხელს ბიუროკრატიული მანქანა უშლის. ამ კონტექსტში მან ერთ-ერთ ძირითად პრობლემად ის გარემოება დაასახელა, რომ მაჟორიტარ დეპუტატებს აღმასრულებელ ხელისუფლებასთან ეფექტური მუშაობის შესაძლებლობა არ ეძლევათ:
„მე კი ვმუშაობდი პოლიტიკურ თანამდებობებზე, მაგრამ ასეთი პირდაპირი შეხება პოლიტიკასთან, როგორიც დღეს პარლამენტიდან მაქვს, არ მქონია და სიმართლე გითხრათ, არც სურვილი არ მქონია, რომ ეს გამოცდილება მიმეღო. ახლა უფრო მეტად ვნახე, რამდენად ბინძურია ეს პოლიტიკა და ნეტა, თავის დროზე მეთქვა უარი და არ შევსულიყავი პარლამენტში და გამეგრძელებინა აღმასრულებელ ხელისუფლებაში მუშაობა.
მე არ ვარ ლიდერი, ლიდერები სხვები არიან, მე რიგითი დეპუტატი ვარ. არავინ არ მებრძვის, მაგრამ, ამავდროულად, თვლიან, რომ ვიღაცა უფრო კარგად აკეთებს რაღაცას პარლამენტში და გააკეთოს, კი ბატონო, ჩემთვის მთავარი ის კი არ არის, კახიშვილი გამოჩნდება თუ არ გამოჩნდება, ჩემთვის მთავარია, უმრავლესობა, რომლის წევრიც ვარ, არ მინდა გაილანძღოს. რაღაც საკითხებს ვერ ვაკეთებ, იმიტომ, რომ ბიუროკრატიული მანქანა მიშლის ხელს. არ მუშაობს კარგად მექანიზმი. როდესაც მე ავიღე პასუხისმგებლობა, რომ მე ვიქნები ადამიანი, რომელიც იქნება შუამავალი საკანონმდებლოსა და აღმასრულებელ ხელისუფლებას შორის, მე ამ პასუხისმგებლობას ვატარებ და ვერავის მივცემ საშუალებას, გამანულოს და სიტყვა, რომელიც ნათქვამი მქონდა, ვერ შევასრულო. ამიტომ, თუ საჭირო იქნება, უფრო მწვავე განცხადებებსაც გავაკეთებ იმისთვის, რომ ცოტა ვიღაც-ვიღაცებმა ყური შეიბერტყონ და რეაგირება დროულად მოახდნონ“,– განაცხადა კახიშვილმა თუმცა კონკრეტული გვარები არ დაუსახელებია.