აშშ-ის სახელმწიფო მდივანი შეშფოთებულია რუსეთის ხელისუფლების ქმედებებით, რომელიც მიმართულია „უცხოელი აგენტების“ შესახებ კანონის საფუძველზე რადიო თავისუფლების(RFE/RL) საქმიანობის აღკვეთისკენ.
მსოფლიოში დემოკრატიული პრინიციპების დასამკვიდრებლად და შესანარჩუნებლად დამოუკიდებელი მედიის როლზე სახელმწიფო მდივანმა ენტონი ბლინკენმა და აშშ-ის გლობალური მედიის სააგენტოს(USAGM) დირექტორის მოვალეობის შემსრულებელმა კელუ ჩაომ ილაპარაკეს 6 აპრილს გამართულ შეხვედრაზე.
სახელმწიფო დეპარტამენტის პრეს-მდივნის, ნედ პრაისის ინფორმაციით, ენტონი ბლინკენმა მტკიცე მხარდაჭერა გამოუცხადა USAGM-ში გაერთიანებულ მედიასაშუალებებს, მათ შორის რადიო თავისუფლებას და „ამერიკის ხმას“. პრაისის განცხადებით, ამ მედიასაშუალებების დამოუკიდებელი სარედაქციო პოლიტიკა განსაკუთრებით მნიშვნელოვანია ქვეყნებში, სადაც რეპრესიული მედიაგარემო და ცენზურაა და გამოხატვის თავისუფლება იზღუდება, ან ისჯება.
სახელმწიფო დეპარტამენტის პრესმდივნის თანახმად, ენტონი ბლინკენმა და კელუ ჩაომ ერთმანეთს გაუზიარეს სერიოზული შეშფოთება იმის გამო, რომ რუსეთის მთავრობა მედიის თავისუფლების შეზღუდვას განაგრძობს და ახალი მოთხოვნებით, მათ შორის პოტენციური სისხლისსამართლებრივი დევნით ცდილობს რუსეთიდან რადიო თავისუფლების განდევნას.
რუსეთში მოქმედი „უცხოელი აგენტების“ შესახებ კანონით, რადიო თავისუფლების რუსული სამსახური ვალდებულია საკუთარი საქმიანობის ფინანსური ანგარიშები წარადგინოს და პუბლიკაციებს კონკრეტული მარკირება გაუკეთოს. ბოლო თვეებში, რუსეთის მარეგულირებელმა სამსახურმა „როსკომნადზორმა“ რადიო თავისუფლების რუსულ სამსახურს და რეგიონულ პროექტებს ბრალად დასდო კანონის 400-მდე დარღვევა და დაახლოებით მილიონი დოლარით დააჯარიმა.