ათენი-ქუთაისის რეისი დღეს, 28 ივლისს სრულდება. ემიგრანტების ნაწილი კი ისევ ბილეთების შეძენის პრობლემებზე საუბრობს. საბერძნეთში ჩარჩენილი საქართველოს მოქალაქეები "მთავართან" ინტერვიუში ყვებიან, რომ მათ კვლავ ვერ შეძლეს 28 ივლისის რეისზე ბილეთების ყიდვა.
"3 დღის განმავლობაში ვცდილობდით გვეყიდა ბილეთი საიტიდან, თუმცა არსებული ბილეთები რატომღაც ვერც ერთმა შევიძინეთ, რომელიც დევს საიტზე. აჩვენებს, რომ არის, თუმცა შეუძლებელია ყიდვა. მივმართეთ საელჩოს, მაგრამ მათ გვითხრეს, რომ მათ არ ეხებათ ეს ბილეთები," - ამბობს "შეცვალე ათენიდან" ხელმძღვანელი ნუცი პატარაშვილი. ემიგრანტების ინფორმაციით, პასუხები არ აქვს საქართველოს საელჩოს ათენშიც. ისინი ხელისუფლებას დროულ რეაგირებას და რეგულარული ფრენების აღდგენას თხოვენ.