უამრავი კომპრომისი შევთავაზეთ და ყველა უარყვეს. მათი შემოთავაზება 100/50 არის მოტყუების, დროის გაწელვისა და უცხოელებთან სახის მობანვის ერთ-ერთი მცდელობა, - ამის შესახებ ფრაქცია „ნაციონალური მოძრაობის" თავმჯდომარე რომან გოცირიძემ ჟურნალისტებს განუცხადა. მისი თქმით, „ქართული ოცნება" ნებისმიერი საარჩევნო სისტემით დამარცხდება.
„უამრავი კომპრომისი შევთავაზეთ: „გერმანული მოდელი", გერმანულის მოდიფიცირებული მოდელი, ასევე არსებულ სისტემაშიც კი მრავალმანდატიანი მაჟორიტარული ოლქის იდეა, რომელიც უფრო ახლოს იყო მანდატების სამართლიან გადანაწილებასთან. ყველა ეს შეთავაზება უარყვეს. ახლაც იტყუებიან. 100/50 არის მოტყუების, დროის გაწელვისა და უცხოელებთან სახის მობანვის ერთ-ერთი მცდელობა. ჩვენს პარტნიორებს კონგრესშიც ატყუებენ, რომ რაღაც სერიოზულ მოლაპარაკებაზე მოდიან. მათი სურვილია, რომ არჩევნებამდე არსებული სისტემით როგორმე მივიდნენ. არაფერი გამოუვათ, ნებისმიერ სისტემაში „ქართული ოცნება" უკვე დამარცხებულია. მათი მიზანია მოლაპარაკებების ჩაშლა, არავითარი ოთხი რაუნდი არ ყოფილა, ეს იყო დროის მოგების მცდელობა, მაგრამ დრო ოპოზიციის, ანუ, ხალხის სასარგებლოს მუშაობს.
კვლავ არის დროის მოგების და პრობლემების გადაგორების მცდელობა. უნდათ, რომ მოლაპარაკებების რაუნდები იმ იმედით გადადონ, რომ იმ საყოველთაო გულისწყრომას ჩააწყნარებენ, რომელიც „ქართულ ოცნებისა" და ბიძინა ივანიშვილის მიმართ არის მთელ მსოფლიოში“, - განაცხადა გოცირიძემ.
რაც შეეხება მმართველი გუნდის წევრთა განცხადებებს, რომ „ქართული ოცნება" საკონსტიტუციო უმრავლესობას აიღებს, გოცირიძის თქმით, ყველა გამოკითხვა მმართველი გუნდის 20%-იან რეიტინგს აჩვენებს.
„რომელ საკონსტიტუციო უმრავლესობაზეა საუბარი, როცა ყველა გამოკითხვა „ქართული ოცნების" 20%-იან რეიტინგს აჩვენებს. ოპოზიციის ჯამური ხმები ორჯერ აღემატება „ქართული ოცნებისა" და მისი სატელიტების ჯამურ ხმას. ძალიან შეშინებული არიან, არ იციან, რა იმოქმედონ,"- აღნიშნა გოცირიძემ.