„ევროპული საქართველოს“ ერთ-ერთი ლიდერის, გიგა ბოკერიას განცხადებით, მშვიდობიანი მაგრამ მწვავე პროტესტი გაგრძელდება იქამდე, ვიდრე ბიძინა ივანიშვილი უკან არ წაიღებს იმ შეურაცხყოფას, რომელიც მთელს საზოგადოებას მიაყენა. ბოკერიას თქმით, ქვეყნისთვის და თვითონ ივანიშვილისთვისაც უკეთესი იქნება, თუ გონს მოეგება.
„ეს არის ჩვენი ვალი მშვიდობიანი, მაგრამ მწვავე პროტესტით გავაგრძელოთ ამ გზავნილის მიტანა ხელისუფლებამდე, ივანიშვილის „კლოუნებამდე“ და თვითონ ივანიშვილამდე იქამდე, სანამ არ წაიღებს უკან იმ შეურაცხყოფას, რომელიც მიაყენა მთელს საზოგადოებას, როცა გვითხრა, რომ გადაგაგდებთ და ფეხებზე მკიდიხართო, მერე ამას მოაყოლა ძალადობა და პოლიტიკური რეპრესიები. თუ გონს მოეგება, უკეთესია ქვეყნისთვის და პერსონალურად მისთვისაც, თუ არ მოეგება გონს, ეს პროტესტი გაგრძელდება და ვნახოთ, როგორ გაუძლებენ“, - განაცხადა გიგა ბოკერიამ.
ბოკერიას განცხადებით, ისინი ცუდი სცენარისთვისაც მზად არიან, რომელიც ვადამდელი ან არჩევნების არსებული სისტემით ჩატარებას გულისხმობს.
„ამ ცუდი სცენარისთვისაც კი ოპოზიცია ვემზადებით. ის დამარცხდება ყველა შემთხვევაში ოღონდ არის შედარებით ნორმალური და ძალიან არანორმალური სცენარი. დღეს ის დგას არანორმალური სცენარის გზაზე და ჩვენ ვალდებულები ვართ ამაზე რეაგირება მოვახდინოთ“, - განაცხადა გიგა ბოკერიამ.