რუსული წარმოების პრეპარატის „ავიფავირის“ მიწოდება კორონავირუსით დაინფიცირებულთა სამკურნალოდ, რუსეთის საავადმყოფოებში 11 ივნისიდან დაიწყება. რუსული მედიის ინფორმაციით, მედიკამენტის გამოყენება მოხდება ექიმების კონტროლით და მისი თავისუფალ ვაჭრობაში გაშვება არ იგეგმება.
მედიის ცნობით, მედიკამენტის გამოყენების შედეგად, კლინიკური კვლევების მონაწილეთა მკურნალობის პერიოდი ცხრიდან ოთხ დღემდე შემცირდა. ამ დროისთვის უკვე წარმოებულია მედიკამენტის 18 ათასი ერთეული.
რუსეთის პირდაპირი ინვესტიციების ფონდის წარმომადგენლის განცხადებით, ტექნოლოგიური სიმძლავრეები თვეში მხოლოდ 60 ათასი შეფუთვის წარმოებას ითვალისწინებს, წელიწადში კი 720 ათასის.
"ავიფავირი" პირველი რუსული პრეპარატია, რომელიც "ფავიპირავირის" ბაზაზე შეიქმნა, რომელსაც იაპონია 2014 წლიდან გრიპის რთული ფორმების სამკურნალოდ გამოიყენებდა. ამ მედიკამენტის ეფექტურობა 80 %-ს შეადგენს, რომელიც რუსეთის ჯანდაცვის სამინისტრომ დაამტკიცა და მედიკამენტების სახელმწიფო რეესტრში ჩართო.