რუსეთი საქართველოში ლუგარის ცენტრის ყველა შენობაში დაშვებას და ნებისმიერ დოკუმენტზე წვდომას ითხოვს. რუსეთის საგარეო საქმეთა სამინისტრო აღნიშნავს, რომ რეალური შემოწმების საშუალებას მხოლოდ აღნიშნული ფორმატი იძლევა. ოფიციალური მოსკოვი ლუგარში რუსი სპეციალისტების ვიზიტს სხვა ქვეყნებისა და საერთაშორისო ორგანიზაციების წარმომადგენლების გარეშე ითხოვს. ამასთან მოსკოვი ქართული მხარის მიერ რუსულ დეზინფორმაციაზე გაკეთებულ განცხადებებს პროვოკაციად აფასებს და აცხადებს, რომ ლუგარის ლაბორატორიასთან შეერთებული შტატების კავშირი კითხვებს აჩენს.
როგორც საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე ამბობს, კრემლი მიზანმიმართულად ცდილობს დააკნინოს ლუგარის ლაბორატორიის მნიშვნელობა, ეჭვების გასაქარწყლებლად კი, საქართველოში რუს სპეციალისტებს ეპატიჟებიან, თუმცა ერთი პირობით, რომ ეს ვიზიტი საერთაშორისო იყოს. თავად ოკუპანტი მხარე კი მოითხოვს, რომ შესაბამისი წვდომა ჰქონდეს ლუგარის ლაბორატორიის საქმიანობის შესასწავლად ნებისმიერ შენობაში, ასევე მათ სურთ წვდომა ნებისმიერ სახის დოკუმენტაციაზე.
"ეს ცენტრი, მოგეხსენებათ უმნიშვნელოვანეს როლს ასრულებს პანდემიის პირობებში და საზოგადოებამ ეს ძალიან კარგად იცის. სამწუხაროა ისიც, რომ რუსეთის მხარე არანაირად არ უწევს ანგარიშს ქართული საზოგადოების აზრს და ამ ცენტრის მნიშვნელობის დაკნინებას ცდილობს. ეს გასაგებია, მოსკოვის საგარეო პოლიტიკის მიზნებს ემსახურება.
რაც შეეხება რუსი ექსპერტების შესაძლო ვიზიტს ცენტრში, ჩვენ ადრეც არა ერთხელ გვითქვამს, რომ საქართველო, როგორც ბიოლოგიური კონვენციის პასუხისმგებელი ცენტრი, მზად არის და ადრეც იყო მზად, დაეშვა რუსი ექსპერტები, რომლებსაც გააჩნიათ შესაბამისი დაშვება უსაფრთხოების ლაბორატორიის ინფრასტრუქტურაზე, თუმცა ვიზიტი შესაძლებელია განხორციელდეს მხოლოდ კონვენციის ფარგლებში არსებული მექანიზმების შესაბამისად. ცალმხრივი ვიზიტების განხილვების შესაძლებლობას ჩვენ არ განვიხილავთ," - განაცხადა ზურაბ აბაშიძემ.