საქართველოს შინაგან საქმეთა ყოფილი მინისტრის, ყოფილი პრემიერ-მინისტრის ვანო მერაბიშვილის განცხადებით, უწყების არც ერთ თანამშრომელს „ციხის კადრებთან“ კავშირი არ ჰქონია.
როგორც მან გადაცემაში „მთავარი აქცენტები“ განაცხადა, ე.წ. ციხის კადრების ნაწილი დადგმული იყო.
„ციხის კადრებზე ვიფიქრეთ, რომ ეს სერიოზული პრობლემა იყო, რომ ჩვენ სერიოზული პრობლემა აღმოგვაჩნდა. ერთი ნაწილი, რა თქმა უნდა, დადგმული იყო. მეორე ნაწილი- კარანტინის დაშლა არა, მაგრამ ერთმა არდადგმულმა კადრმა მეორეს დამაჯერებლობა შესძინა. თუმცა, ეს სრულიად არ გვამართლებს“,- განაცხადა მერაბიშვილმა.
კითხვაზე, როგორ მოახეხეს ციხეში კადრების დადგმა, ვანო მერაბიშვილმა უპასუხა, რომ ანალოგიური კადრები შესაძლოა, „ნებისმიერ ქვეყანაში გადაიღონ“.
„ ამის გაკეთება არავითარ პრობლემას არ წამოადგენდა. თუ ციხის თანამშრომელი ამას აკეთებს, ამაში რა არის პრობლემა, პრობლემა ისაა, რომ ასეთი თანამშრომელი მუშაობს“,-განაცხადა მან.
ვანო მერაბიშვილმა ბაჩო ახალაიასთან ურთიერთობაზეც ისაუბრა. მისი თქმით, ახალაიასთან დაპირიპისრება მისი მხრიდან არ ყოფილა. „პირველი, ჩემი მხრიდან ბაჩო ახალაიას მიმართ არავითარი დაპირისპირება არ ყოფილა. მეორე, შინაგან საქმეთა სამინისტროს არცერთ თანამშრომელს ციხის კადრებთან დაკავშირებით კავშირი არ ჰქონია. არცერთ ადამიანს არ ჰქონია არავითარი კავშირი ბედუკაძის ან ნებისმიერი სხვა პირის საქართველოდან გაყვანასთან დაკავშირებით“, - განაცხადა მერაბიშვილმა.