ინფექციური საავადმყოფოს დირექტორი თენგიზ ცერცვაძე მიიჩნევს, რომ საეჭვო პაციენტისთვის ახალ კორონავირუსზე ტესტის ჩატარებისთვის აუცილებელი მოთხოვნა  სარისკო ქცევა (მოგზაურობის ისტორია ან/და უცხოელთან კონტაქტი) აღარ უნდა იყოს, რადგან ქვეყანაში შიდა გავრცელება დაიწყო.
ცერცვაძის თქმით, დღეს არსებული წესებით, იმისათვის, რომ პაციენტს ტესტირება ჩაუტარდეს, ორ პირობას უნდა აკმაყოფილებდეს. კერძოდ, ადამიანს უნდა ჰქონდეს მწვავე რესპირატორული ინფექციის ნიშნები და ამავდროულოდ, აუცილებლად ეპიდანამნეზში უნდა ჰქონდეს სარისკო ქცევა:
“მეორე აუცილებელი პირობა იყო, რომ პაციენტს ჰქონოდა საზღვარგარეთ მგზავრობის ისწტორია, ან კონტაქტში ყოფილიყო უცხოეთიდან ჩამოსულ სავარაუდო ინფიცირებულთა. ეს დღემდე რჩება ტესტირებისთვის აუცილებელ პირობად. ჩემი აზრით, სასურველია ეს პირობა გაუქმდეს, რადგან შიდა გადაცემა დაიწყო (აღნიშნული ნიშნავს იმას, რომ პაციენტმა შესაძლოა არ იცოდეს ვისგან შეიძლება გადადებოდა)”, – უთხრა ცერცვაძემ ნეტგაზეთს.
მისივე თქმით, ადამიანი შეიძლება გავიდეს ქუჩაში და იქ დაინფიცირდეს, შესაბამისად, არ იცოდეს, ვისგან გადაედო ვირუსი.  როგორც ცერცვაძე ამბობს, ჯერჯერობით, მარნეულსა და ზუგდიდში დაფიქსირდა ისეთი დაინფიცირების შემთხვევები, როდესაც წყარო უცნობია.
ცერცვაძის მოსაზრებით, სწორედ ამ გარემოებების გათვალისწინებით, მოგზაურობასთან დაკავშირებული ისტორია არ უნდა იყოს აუცილებელი პაციენტის კორონავირუსზე შესამოწმებლად.