რუსეთში კორონავირუსით ინფიცირებულთა რიცხვმა 1500-ს გადააჭარბა. უკანასკნელი დღე-ღამის განმავლობაში გამოვლენილია 270 ახალი შემთხვევა, მთლიანად რუსეთში გარდაცვლილია რვა ადამიანი, - იტყობინებიან ქვეყნის ჯანდაცვის ორგანოები.
რუსეთის მთავრობამ გამოაცხადა, რომ 30 მარტიდან საზღვრების ჩაკეტვას აპირებს. აკრძალვა სხვათა შორის არ გავრცელდება რუსეთის დიპლომატებსა და სატვირთო ავტომობილების მძღოლებზე.
დაავადების ახალი შემთხვევების უდიდესი ნაწილი - 197 - დაფიქსირებულია მოსკოვში, სადაც მთლიანობაში, ოფიციალური მონაცემებით, 1000 შემთხვევაა დადასტურებული.
რუსეთის ჯანდაცვის სფეროს წარმომადგენლები აცხადებენ, რომ უახლოეს დღეებში ინფიცირების შემთხვევათა რიცხვის მკვეთრი ზრდა არის მოსალოდნელი მოსკოვში გაფართოებული ტესტირების გამო.
ამჟამად მსოფლიოში კორონავირუსით ინფიცირებულთა რიცხვმა 684 ათასს გადააჭარბა. გარდაიცვალა 32 ათასზე მეტი ადამიანი. გამოჯანმრთელდა 145 ათასამდე.