თურქი სამხედროები, რომლებიც იდლიბის დეასკალაციის ზონაში სიირის სამთავრობო ძალების თავდასხმის ქვეშ მოჰყვნენ, იქ არ უნდა ყოფილიყვნენ, - ამის შესახებ ნათქვამია განცხადებაში, რომელსაც რუსეთის თავდაცვის სამინისტრო ავრცელებს.
მათივე ცნობით, 27 თებერვალს ტერორისტული დაჯგუფების წევრები ცდილობდნენ სირიის სამთავრობო არმიის პოზიციებზე თავდასხმები განეხორციელებინათ, რომელსაც სამთავრობო ძალებმა ცეცხლით უპასუხეს, მის ქვეშ კი თურქეთის ჯარები მოყვნენ, „რომლებიც იმყოფებოდნენ ტერორისტული ჯგუფების რიგებში“.
„დასახლებაში, სადაც ინციდენტი მოხდა „რუსეთის საჰაერო-კოსმოსური ძალების ავიაცია არ გამოიყენებოდა,” - აღნიშნულია განცხადებაში.
შეგახსენებთ, წუხელ, რუსეთის მიერ მხარდაჭერილი სირიის სამთავრობო ძალების თავდასხმების შედეგად, სულ მცირე 33 თუქრი ჯარისკაცი დაიღუპა. აღნიშნულის შემდეგ მედიის ინფორმაციით, თურქეთისა და სირიის ოპოზიციის ძალები ინტენსიურ შეტევებს ახორციელებენ იდლიბის რეგიონის საკვანძო ქალაქებში.