შინაგან საქმეთა სამინისტროს თანამშრომლებმა ისნის საოლქო საარჩევნო კომისიის თავმჯდომარის, თედო გობეჯიშვილის გარდაცვალების საქმეზე 1975 წელს დაბადებული ორი პირი - აკაკი კობალაძე და აკაკი ხუსკივაძე დააკავეს. 
როგორც უწყების მიერ გავრცელებულ განცხადებაში წერია, მას შემდეგ, რაც თედორე გობეჯიშვილისგან უარი მიიღეს, ბრალდებულები ისნის N5 საოლქო საარჩევნო კომისიის თავმჯდომარეს დაემუქრნენ   ანგარიშსწორებით და  აიძულებდნენ,  დასთანხმებოდა შემოთავაზებულ წინადადებას. 
ბრალდებულებთან შეხვედრის მეორე დღეს -2020 წლის 7 ნოემბერს  1977 წელს
დაბადებული თედორე გობეჯიშვილი საკუთარ საცხოვრებელ ბინაში გარდაიცვალა. 
გამოძიება  საქართველოს სისხლის სამართლის კოდექსის 339-ე მუხლის პირველი ნაწილით, 151-ე მუხლის მეორე ნაწილის  “ა” ქვეპუნქტით და 150-ე მუხლის მეორე ნაწილის “ბ” ქვეპუნქტით მიმდინარეობს, რაც ქრთამის შეთავაზებას, ჯგუფურად ჩადენილ იძულებას და ჯგუფურად ჩადენილ მუქარას გულისხმობს.
ქართული ოცნების წევრმა, გიორგი ხელაშვილმა დღეს, 7 ოქტომბერს ბრიფინგი გამართა, სადაც ისნის საოლქო კომისიის თავმჯდომარის, თედო გობეჯიშვილის გარდაცვალების შესახებ ილაპარაკა და თქვა, რომ ნაციონალური მოძრაობის აქტივისტები გუშინ საოლქო კომისიის თავმჯდომარეებს და მათ შორის გობეჯიშვილს, რეპრესიებით ემუქრებოდნენ.