დროებით ოკუპირებული აფხაზეთის ე.წ. საგანგებო სიტუაციების მინისტრი ლევ კვიცინია "რუსეთის ფედერაციის ახალ რეგიონებთან ურთიერთობის საკითხებში პრეზიდენტის სპეციალურ წარმომადგენლად" დაინიშნა. როგორც "რადიო თავისუფლების" რუსულენოვანი ბიურო წერს, განკარგულებას ხელი ასლან ბჟანიამ მოაწერა.
არსებული ინფორმაციით, ლევ კვიცინია დროებით ოკუპირებული აფხაზეთის ე.წ პრეზიდენტის სპეციალურ წარმომადგენელი იქნება უკრაინის დროებით ოკუირებილი დონეცკის, ლუგანსკისა, ზაპოროჟიეს და ხერსონის ოლქებში.
"კვიცინია ლევ კონსტანტინოვიჩი დაინიშნოს აფხაზეთის რესპუბლიკის პრეზიდენტის სპეციალურ წარმომადგენლად რუსეთის ფედერაციის ახალ რეგიონებთან ურთიერთობის საკითხებში", - წერია განკარგულებაში.
შეგახსენებთ, ე.წ. რეფერენდუმების ჩატარების შემდეგ, პუტინმა უკრაინის 4 ოკუპირებული რეგიონის ანექსიას ხელი 30 სექტემბერს მოაწერა.