უკრაინის საგარეო საქმეთა სამინისტრომ დემარშის წერილი გაუგზავნა იმ ქვეყნებს, რომლებიც მოსკოვში წითელ მოედანზე გამართულ აღლუმს ესწრებოდნენ. 
როგორც უკრაინის საგარეო საქმეთა სამინისტროს სპიკერი, ოლეგ ნიკოლენკო წერს, ამ ქვეყნებს შორის არიან: სომხეთი, ყაზახეთი, ყირგიზეთი, ტაჯიკეთი, თურქმენეთი და უზბეკეთი. 
მისივე თქმით, ღონისძიებაზე რომელსაც ზემოთ ჩამოთვლილი ქვეყნების ლიდერები იყვნენ, რუსეთის პრეზიდენტი ვლადიმერ პუტინი ამართლებდა უკრაინელების ხოცვას, უკრაინული ქალაქებისა და სოფლების დანგრევას, უკრაინელი ბავშვების გატაცებას და ოკუპირებულ ტერიტორიებზე უკრაინის მოქალაქეების რეპრესიას. 

"შეხვედრამდე ერთი ღამით ადრე, რუსეთის ფედერაციამ 25 ფრთოსანი რაკეტა ისროლა უკრაინის მიმართულებით, მათ შრის 15 კიევში, იმისთვის რომ უფრო მეტი სიკვდილი და უფრო მეტი დესტრუქცია გამოეწვია უკრაინულ მიწაზე," - წერს ნიკოლენკო. 

ამავე აღლუმზე მონაწილეებს რუსული სამხედრო აღჭურვილობაც აჩვენეს, რომლებსაც რუსეთი არაპროვოცირებულ აგრესიულ ომში იყენებს. 
ნიკოლენკოს თქმით, უკრაინა აღნიშნული ქვეყნების ლიდერების მონაწილეობას ღონისძიებაში, ომის დამნაშავესთან ერთად, რომელიც თავს იწონებს მეორე მსოფლიო ომის შემდეგ ევროპაში ყველაზე დიდი ომის გაჩაღებით, განიხილავს როგორც ამორალურ და არამეგობრულ ნაბიჯს უკრაინელი ხალხის მიმართ.
მისივე სიტყვებით, ცენტრალური აზიისა და კავკასიის ქვეყნებმა მნიშვნელოვანი წვლილი შეიტანეს ფაშიზმის დამარცხებაში 78 წლის წინ და ისინი არ იმსახურებენ, რომ ახლა კრემლმა გამოიყენოს.