"ერთიანი ნაციონალური მოძრაობის" თავმჯდომარე, ლევან ხაბეიშვილი საგარეო საქმეთა სამინისტროში ნორვეგიის ელჩის დაბარებას ეხმაურება და ამბობს, რომ მომხდარი ქვეყნის სირცხვილია.

"ამ ადამიანს, ასეთ პირობებში, როცა პუტინის ტყვეობაში იმყოფება, მხარს უჭერს პრეზიდენტ ზელენსკი, ასევე პუტინთან მებრძოლი მთავარსარდალი, პოლონეთის პრეზიდენტი დუდა, პოლონეთის სეიმი, ლიტვა, ესტონეთი, მაკრონმა, საფრანგეთის პრეზიდენტმაც გააკეთა განცხადება პრეზიდენტ სააკაშვილის გათავისუფლებასთან დაკავშირებით და დაძაბოს აბა გონება რუსული ოცნების მხარდამჭერებმა, ვინ არის რუსული ოცნების პარტნიორი - სალავიოვი, მარგარიტა სიმონიანი, პუტინი, ლავროვიო, სხვა მათ მოკავშირე ევროპულ ქვეყნებში არ ჰყავთ, შესაბამისად, ის რაც დღეს იკადრეს, არის სირცხვილი ჩვენი ქვეყნისთვის, როცა ნორვეგიის ელჩი ამის გამო დაიბარეს", - თქვა ლევან ხაბეიშვილმა.

გარდა ამისა, ხაბეიშვილი გამოეხმაურა მიხეილ სააკაშვილის ჯანმრთელობის მდგომარეობას და სახალხო დამცველს მოუწოდა, უზრუნველყოს კლინიკა ვივა მედში კონსილიუმის შესვლა.
შეგახსენებთ, მიხეილ სააკაშვილისთვის გადაცემული ჯილდოს გამო, ნორვეგიის ელჩი საგარეო საქმეთა სამინისტროში დაიბარეს.