"თუ გინდათ გაიგოთ როგორ უძლებს რუსეთი მძიმე სანქციებს, აქ უნდა ჩამოხვიდეთ, მოსაზღვრე საქართველოში... ეს პუტინის მომარაგების ხაზია" - NBC-ის  ჟურნალისტი რომელიც ლარსის სასაზღვრო გამშვებ პუნქტთან ჩავიდა, სწორედ ასე იწყებს სიუჟეტს. ამერიკულმა ტელევიზიამ სიუჟეტი მოამზადა იმაზე, თუ როგორ ახერხებს რუსეთი სანქციების გვერდის ავლას  და სათაურადაც ეს წინადადება გამოიტანა. 
 NBC ყვება, როგორ იყენებს მოსკოვი შავ ხვრელად საქართველოს, რომ პუტინის ომის დაწყების შემდეგ დაწესებულ სანქციებს გვერდი აუაროს. სიუჟეტში კარგად ჩანს რომ პუტინის რეჟიმს საერთაშორისო სანქციებისგან  თავის არიდებაში საქართველო და ჩინეთი ეხმარებიან; ავტორის თქმით ამას სატელიტიდან გადაღებული ის ფოტოებიც მოწმობს, რომელიც საქართველო-რუსეთისა და ჩინეთ-რუსეთის საზღვრებზე არსებულ ვითარებას  ასახავს.