რუსეთის საგარეო საქმეთა სამინისტრომ ლატვიის ელჩს მარის რიექსტინსს, რუსეთის ტერიტორიის დატოვება მოსთხოვა და ამისთვის 2 კვირიანი ვადა მისცა. საგარეო საქმეთა სამინისტროს განცხადებით, დღეს, 27 იანვარს, ლატვიის საქმეთა დროებითი რწმუნებული დაჩია რუტკა სამინისტროში დაიბარეს და გააპროტესტეს ლატვიის ხელისუფლების გადაწყვეტილება, რუსეთ-ლატვიის დიპლომატიური ურთიერთობების დონის დაწევის შესახებ.
რუსი ოფიციალური პირები ასევე იმუქრებოდნენ, რომ "ლატვიის ხელისუფლების პროვოკაციულ დემარშს დიპლომატიური ურთიერთობების დონის შემცირების მიზნით", შედეგები მოჰყვება.
რუსეთის თავდაპირველი გადაწყვეტილებით, ლატვიის ელჩს ქვეყანა 24 თებერვალს უნდა დაეტოვებინა, თუმცა დღეს ცნობილი გახდა, რომ მოსკოვი არ დაელოდება ამ თარიღს.
რუსეთმა ლატვიასა და ესტონეთთან დიპლომატიური ურთიერთობების შემცირების გადაწყვეტილება ბალტიის ქვეყნებში "ტოტალური რუსოფობიის" მიზეზით მიიღო.