მოსკოვმა კიევთან სამშვიდობო შეთანხმების გაფორმების პირობების შესახებ წინადადება მიიღო, - იუწყება რუსი პოლიტოლოგი და ისტორიკოსი ვალერი სოლოვეი კრემლში საკუთარ წყაროებზე დაყრდნობით.
იგი ხაზგასმით აღნიშნავს, რომ ეს პირობები უკრაინულ მხარესთან უკვე შეთანხმებულია და არსობრივად, რუსეთის კაპიტულაციის ტოლფასი.
წინადადებები, მისი ინფორმაციით, შემდეგში მდგომარეობს:

1. რუსეთის შეიარაღებული ძალები უკრაინას სრულად ტოვებენ (დონეცკისა და ლუჰანსკის ე.წ. სახალხო რესპუბლიკების ტერიტორიების ჩათვლით, რომლებიც რუსეთს უკვე "ფედერაციის სუბიექტებად" აქვს გამოცხადებული);
2. ყირიმის სტატუსის საკითხი 7 წლით "იყინება", თუმცა ნახევარკუნძული დემილიტარიზებულ ზონად ცხადდება (პოლიციასა თუ მესაზღვრეებს მხოლოდ სასროლი იარაღის ფლობის უფლება შეიძლება, ჰქონდეთ);
3. რუსეთის შავი ზღვის ფლოტი ყირიმს ტოვებს;
4. რუსეთსა და ბელარუსთან უკრაინის საზღვრებზე ყალიბდება 100 კმ სიგანის დემილიტარიზებული ზოლი, რომელშიც მძიმე შეიარაღების გამოჩენა იკრძალება;
5. რუსეთი დნესტრისპირეთს ტოვებს (მხედველობაშია იქ არსებული რუსული სამხედრო ბაზა);
6. 2023 წელს დნესტრისპირეთის რეგიონი რეინტეგრირდება მოლდოვას შემადგენლობაში და რუსეთი ვალდებულებას იღებს, ამას ხელი არ შეუშალოს.

ამ 6 პირობის სანაცვლოდ უკრაინა იღებს ერთადერთ ვალდებულებას, - 7 წლის განმავლობაში ნატო-ში არ გაწევრიანდეს.
სოლოვეის წყაროების ინფორმაციით, სამშვიდობო შეთანხმების აღსრულების გარანტორობა უკვე ითავა მსოფლიოს 6-მა წამყვანმა სახელმწიფომ.
ამგვარად, უკრაინა-რუსეთის სამშვიდობო შეთანხმების პირობები მოლდოვას დეოკუპაციასაც მოიცავს.
საქართველო კი, კერძოდ, ქვეყნის დეოკუპაცია, თუ სოლოვეის კრემლელ წყაროებს დავუჯერებთ, შეთავაზებული შეთანხმების პირობებში არ ფიგურირებს.