რუსეთის პრეზიდენტი ვლადიმირ პუტინი მიიჩნევს, რომ ამერიკის შეერთებულ შტატებთან ერთობლივი მუშაობის შედეგი უნდა იყოს მყარი სამართლებრივი გარანტიები, რათა გამოირიცხოს აღმოსავლეთისკენ ნატოს წინსვლა და რუსეთის საზღვრების უშუალო სიახლოვეს შეიარაღების განთავსება. ამის შესახებ საუბარია პრესრელიზში, რომელიც კრემლმა გამოაქვეყნა რუსეთის და ამერიკის შეერთებული შტატების პრეზიდენტებს შორის 30 დეკემბერს გამართული სატელეფონო საუბრის შემდეგ.
კრემლის თანახმად, „აქცენტირებული იყო, რომ თითოეული ქვეყნის უსაფრთხოების უზრუნველყოფა შესაძლებელია მხოლოდ უსაფრთხოების განუყოფელობის პრინციპის მკაცრად დაცვის საფუძველზე“.
პრეზიდენტ პუტინის ადმინისტრაციის ინფორმაციით, ჯო ბაიდენმა ხაზი გაუსვა ევროპასა და მთლიანად მსოფლიოში სტაბილურობის უზრუნველსაყოფად რუსეთის და ამერიკის შეერთებული შტატების განსაკუთრებულ პასუხისმგებლობას და ასევე, იმას, რომ ვაშინგტონს არ აქვს უკრაინის ტერიტორიაზე დამრტყმელი, შეტევითი შეიარაღების განთავსების განზრახვა.
კრემლის ცნობითვე, რუსულმა მხარემ ამომწურავი პასუხი გასცა ბაიდენის მიერ ისევ ნახსენებ, მასშტაბური სანქციების ვარიანტს უკრაინის გარშემო სიტუაციის ესკალაციის შემთხვევაში. კრემლის ოფიციალური შეტყობინების მიხედვით, პუტინმა ბაიდენს უთხრა, რომ ეს იქნება "უსერიოზულესი შეცდომა", რომელიც რუსეთ-ამერიკის ურთიერთობებს ფაქტობრივად, სრულად გაწყვეტით ემუქრება.