დაშინება, ზეწოლა და მუქარა ზუგდიდში ენმ-ს წევრზე. დღეს გამართულ საგანგებო ბრიფინგზე, პარტიის წევრმა და დეპუტატმა ანი წითლიძემ რევაზ გვილიას შესახებ გააკეთა განცხადება. წითლიძის თქმით, ყულიშკარის მკვიდრი "ქართული ოცნების" შტაბში დაიბარეს და დაემუქრნენ, თუ არ დატოვებდა ოპოზიციურ ძალას და არ ითანამშრომლებდა სახელისუფლებო პარტიასთან, რუსეთს გადასცემდნენ.
საქმე იმაშია, რომ გვილიას გადაცემას ოკუპანტი სახელმწიფო წლების წინ, გადაუხდელი საბანკო დავალიანების გამო ითხოვს.
წითლიძის ინფორმაციით, გვილიას "ოცნების" შტაბში ყოფილი დეპუტატი მერაბ ქვარაია, "ოცნების" მერობის კანდიდატი ზუგდიდში - მამუკა წოწერია და კიდევ ერთი სამხედრო პირი დახვდა და თითქმის 2 საათის განმავლობაში აიძულებდნენ მათი დავალება შეესრულებინა - კერძოდ, სოციალურ ქსელში დაეწერა პოსტი, რომ ტოვებდა ენმ-ს და მიეტანა სანათესაოს სია, დაახლოებით 30 ხელმოწერით და პირობით, რომ 2 ოქტომბრის არჩევნებში ზუგდიდში, ისინი სახელისუფლებო კანდიდატს დაუჭერდნენ მხარს. 
გვილიამ მათი მოთხოვნა შეასრულა და "ფეისბუქზე" ენმ-დან წასვლის შესახებ დაწერა, თუმცა როგორც მოგვიანებით ანი წითლიძეს უთხრა, მან ეს ყველაფერი დაშინებისა და მუქარის შედეგად გააკეთა.
ანი წითლიძე ფაქტის შესახებ პროკურატურას მიმართავს და მოუწოდებს დაინტერესდეს, ამოიღოს სათვალთვალო კამერების ჩანაწერები "ოცნების" შტაბიდან, ასევე მიმდებარე ტერიტორიებზე დამონტაჟებული კამერებიდან და დაიწყოს გამოძიება.
თავად გვილია კი შიშობს, რომ ხელისუფლება მუქარას აასრულებს და რუსეთს გადასცემენ.