რომელ რეფერენდუმზეა საერთოდ საუბარი,  "ქართულ ოცნებას" მილიონზე მეტმა ამომრჩეველმა დაუჭირა მხარი და მოგვცა მანდატი, ვმართოთ ქვეყანა 4 წლის განმავლობაში, ასე რომ, არავის მივცემთ უფლებას, მილიონი ამომრჩევლის არჩევანი კითხვის ნიშნის ქვეშ დააყენოს - თქვა პრემიერმინისტრმა ღარიბაშვილმა, თიანეთის მერობის კანდიდატის წარდგენაზე.
ღარიბაშვილი ამომრჩეველს არწმუნებს, რომ ოპოზიციური პარტიების რეიტინგი 25%-ს არ სცდება. 

"უყურეთ, როგორი ცრუ პროპაგანდა აქვთ მათ მოგონილი და როგორ მუშაობს მათი პროპაგანდისტული მანქანა: გამოაცხადეს რეფერენდუმი, წარმოიდგინეთ, რამხელა ფარსია თვითონ ეს სიტყვა – როგორ შეიძლება, რეფერენდუმი გამოაცხადოს 20%-იანმა პარტიამ და მათზე მიკედლებულმა 2-3%-იანმა პარტიებმა, ზოგს საერთოდ ერთი პროცენტიც კი არ აქვს გადალახული. მათი მთავრი ამოცანაა ამ 20% თუ 25% მობილიზება გაუკეთონ.",- ამბობს ირაკლი ღარიბაშვილი.

ცნობისთვის, 19 აპრილის შეთანხმების მიხედვით, "ქართული ოცნების" 2021 წლის 16 აპრილის შეთავაზების შესაბამისად, ვადამდელი საპარლამენტო არჩევნები დაინიშნება 2022 წელს იმ შემთხვევაში, თუ 2021 წლის ოქტომბრის ადგილობრივი თვითმმართველობის არჩევნებში პარტია ქართული ოცნება მიიღებს ნამდვილი პროპორციული ხმების 43% -ზე ნაკლებს.