ორგანიზაცია ალტ-ინფოს ეროვნული მაუწყებლის სტატუსი მიენიჭა. გადაწყვეტილება კომუნიკაციების ეროვნულმა კომისიამ ცოტა ხნის წინ მიიღო. ამ გადაწყვეტილებით, ალტ-ინფოს მაუწყებლობა შეზღუდული აღარ იქნება და საქართველოს ნებისმიერ რეგიონში მოსახლეობას შეეძლება გადაცემების ნახვა. 
ალტ-ინფოს დამფუძნებელი, ზურაბ მახარაძე 5 ივლისის ძალადობის ერთ-ერთი ორგანიზატორია, სწორედ ალტ-ინფოს ეთერიდან, 5 ივლისამდე სიძულვილის ენა და მუქარის შემცველი განცხადებები ვრცელდებოდა. 
არასამთავრობო ორგანიზაციების წარმომადგენლების თქმით, მნიშვნელოვანი იყო, რომ პროკურატურას დროულად და ეფექტურად გამოეძიებინა საქმე, ვინაიდან ასეთ შემთხვევაში შესაძლოა დამდგარიყო კონკრეტული პირების პასუხისმგებლობა და კომუნიკაციის კომისიას გადაწყვეტილების მიღება ალტ-ინფოს მაუწყებლობასთან დაკავშირებით, აღარ მოუწევდა.

"მნიშვნელოვანი იყო, რომ პროკურატურას დროულად შეეფასებინა ეს გარემოებები, დროულად გამოეძიებინა ეს ყველაფერი, თუმცა ვნახეთ, რომ ძალადობრივ მოწოდებებთან მიმართებით და ძალადობის ორგანიზებასთან პროკურატურის და გამოძიების რეაგირება არის ნული. ამდენად, რომ ყოფილიყო დროული და ეფექტური რეაგირება ამ საკითხთან მიმართებით, შესაძლებელი დადგენილიყო გარკვეულ პირთა პასუხისმგებლობის საკითხი, რომლის შემდეგაც, ამ საკითხის გადაწყვეტა კომუნიკაციის კომისიას უკვე აღარც მოუწევდა",-თქვა ნიკა სიმონიშვილმა.

ცნობისთვის, 5 ივლისის ძალადობრივ მოვლენებზე ალტ-ინფოს დამფუძნებლის, ზურაბ მახარაძის პასუხისმგებლობაზე 6 სექტემბერს სახალხო დამცველმაც ისაუბრა. ნინო ლომჯარიას თქმით, მან პროკურატურას მიმართა, რომ მახარაძის მიმართ სისხლის სამართლებრივი დევნა დაიწყოს.