დაავადებათა კონტროლის ეროვნული ცენტრის დირექტორი, ამირან გამყრელიძე საკუთარ განცხადებას განმარტავს და ამბობს, რომ მას არასწორი ინტერპრეტაცია მოჰყვა. მისი თქმით, წინადადებაში "პოლიტიკა უფრო მაღლა დადგა ეპიდსიტუაციასთან შედარებით" იგულისხმებოდა, რომ პოლიტიკოსები ეპიდსიტუაციის მიმართ მეტ ყურადღებს იჩენენ, როგორც პოლიტიკური თემის და არა როგორც ეპიდემიოლოგიური.
მისივე თქმით, უმცრესობაში ყოფნაზე საუბრისას იგულისხმა, რომ საკოორდინაციო საბჭოს მხოლოდ 4 სამედიცინო სფეროს წარმომადგენელი ესწრება.

"არასწორი ინტერპრეტაცია მიეცა ჩემ გამონათქვამებს, ბოლომდე უნდა მოისმინოს ის.. მე იქ ვთქვი, რომ დღეს სამწუხაროდ კოვიდი გახდა ქვეყანაში პოლიტიკური თემა და პოლიტიკური დისკუსიების თემა, მეტი ყურადღებას პოლიტიკოსები ავლენენ როგორც პოლიტიკური თემის მიმართ, ვიდრე ეპიდემიოლოგიური თემის მიმართ. ეს იყო არსი ჩემი ნათქვამის. 
მე ხშირად ვაფიქსირებ და ვამბობ, რომ პოლიტიკურ განცხადებებს არ ვაკეთებ, განა იმიტომ, რომ არ შემიძლია, მე ვარ დღეს და დიდი ხანია უკვე აპოლიტიკური პიროვნება", - თქვა ამირან გამყრელიძემ. 

მისი თქმით, პოლიტიკაში არ ერევა და მიზანი პანდემიის უკეთესად მართვაა. გამყრელიძე ამბობს, რომ საკოორდინაციო საბჭოზე ექიების რეკომენდაციებს საკმაოდ მაღალი წონა აქვს, მაგრამ გადაწყვეტილებები ბალანსის და კონსენსუსის პრინციპით მიიღება.