საქართველოში შეერთებული შტატების ელჩი, კელი დეგნანი ამბობს, რომ საქართველოს მთავრობის განცხადება ევროკავშირის დახმარებასთან დაკავშირებით მოულოდნელი იყო. დეგნანის თქმით, ამ გადაწყვეტილებას ვაშინგტონიც გამოეხმაურება.
ჟურნალისტებთან საუბრისას, კელი დეგნანმა თქვა, რომ არ აქვს მნიშვნელობა მთავრობა ევროკავშირის დახმარებას აირებს თუ არა, ქვეყანაში უნდა განხორციელდეს რეფორმები, რომელზეც საქართველომ ვალდებულება აიღო.

"ცოტა გაოცებულები ვიყავით მთავრობის განცხადებით, რომ საქართველოს არ სჭირდება 75 მილიონი ევრო, მიუხედავად, პანდემიისა, უმუშევრობისა და მიუხედავად იმ მდგომარეობისა, რაც საქართველოში არსებობს. რა თქმა უნდა, ამას გამოეხმაურება ვაშინგტონიც.
გასათვალისწინებელია ის, რომ ის რეფორმები რომელიც უნდა განხორციელებულიყო და ამაზე დიდი მუშაობა მიმდინარეობდა გასულ წელს, არ უნდა შეჩერდეს, ეს მართლაც რთული და მნიშვნელოვანი რეფორმაა, კონგრესი უყურებს როგორ მიმდინარეობს ეს პროცესები, ჩვენ ახლო კოორდინაციაში ვართ საქართველოს მთავრობასთან და ვიცით, რა სჭირდება საქართველოს",- თქვა კელი დეგნანმა.

ევროკავშირი საქართველოს €75-მილიონიან დახმარებას არ გადაურიცხავს. პრემიერმინისტრი ამტკიცებს, რომ ევროკავშირის თანხა არა დახმარება, არამედ ვალია და მასზე უარს თავად მთავრობა ამბობს. ღარიბაშვილის კომენტარებს ევროკავშირი განცხადებით გამოეხმაურა, რომელშიც ეწერა, რომ საქართველომ ვერ შეძლო საკმარისად შეესრულებინა მაკროფინანსური დახმარების მიღების პირობა. კერძოდ, გაეზარდა სასამართლო სისტემის დამოუკიდებლობა, ანგარიშვალდებულება და ხარისხი.