გაერთიანებული ოპოზიციის თბილისის საკრებულოს თავმჯდომარეობის კანდიდატი ელენე ხოშტარია, თბილისის ქუჩებში გაკრულ, სიძულვილის ენის შემცველ პლაკატებს საგანგებო ბრიფინგით გამოეხმაურა. როგორც ელენე ხოშტარია აღნიშნავს, ეს პლაკატები, პირველ რიგში, საზოგადოების შეურაცხყოფაა.

"მინდა გამოვეხმაურო, იმ ბინძურ კამპანიას, რომელიც "ქართულმა ოცნებამ" დაიწყო, როგორც კი ჩაეშვა წინასაარჩევნო კამპანია, ჩვენ ვნახეთ, რომ გუშინ მთელი ღამის განმავლობაში ქალაქში გააკრეს ზიზღის პლაკატები. პირველ რიგში, ეს არის საზოგადოების, ამომრჩევლის შეურაცხყოფა, მიუხედავად იმისა, თუ ვის როგორი პოლიტიკური პოზიცია აქვს", - ამბობს ხოშტარია. 

მისივე თქმით, მმართველი გუნდი საბჭოთა ტრადიციის მიხედვით, ადამიანებს უქმნის ზიზღის სამიზნეებს და ამით "ცდილობს ადამიანების ტვინით და ემოციებით მანიპულაციას". როგორც ელენე ხოშტარია ამბობს, "ეს საბოლოო ჯამში ქვეყნისთვის ძალიან საშიშ მოვლენას ზიზღსა და დაპირისპირებას იწვევს". 

"ვხედავთ, რომ ეს ზიზღის და სიძულვილის კამპანია აგრძელებს ჟურნალისტებსა და აქტივისტებზე თავდასხმის კამპანია, რომელსაც შეეწირა ერთი მათგანის სიცოცხლე და მათი ნაწილი დღემდე საავადმყოფოში რჩება. ნაცვლად იმისა, რომ ხელისუფლებამ დასაჯოს ამ წარმოუდგენელი ძალადობის ორგანიზატორები, გამოაკრეს ზიზღის ობიექტებად ის ჟურნალისტები და მედიის წარმომადგენლები, რომლებსაც თავად დაესხნენ თავს. ეს არის წარმოუდგენელი ცინიზმი, უსამართლობა და ქვეყნის დანგრევა", - თქვა მან.

ელენე ხოშტარიამ ასევე მაგალითად მოიყვანა მერიის საქციელი, მაშინ როდესაც სამოქალაქო აქტივისტები თბილისის ქუჩებში ანტისაოკუპაციო პლაკატებს აკრავენ, როგორც ის ამბობს, ასეთ დროს აქტივისტებს სუს-ი დასდევს, აკავებს და უსწორდება.