ფოტო © ipn.ge

სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ რუსეთის პრეზიდენტს, ვლადიმერ პუტინს შესაძლოა, ორ ქართველ მეფესთან , ვახტანგ მეექვსესთან და თეიმურაზ პირველთან დაკავშირებული ისტორიული მასალები გადასცეს.
როგორც "ინტერპრესნიუსს" "კავკასიის ფონდის" პრეზიდენტმა, პროფესორმა გივი ღამბაშიძემ განუცხადა, უწმინდესს რუსეთში დაკრძალული ქართველი მეფეების გადმოსვენების საკითხზე საუბარი როგორც რუსეთის პატრიარქთან, ისე რუსეთის ხელისუფლების წარმომადგენლებთან ექნება.
"პატრიარქის თხოვნით მეუფე გერასიმეს მთელი ჩემი 30 წლიანი ისტორიული მასალები გადავეცი, რომელიც შეიძლება რუსეთის პრეზიდენტს გადასცენ. ეს მასალები მე უკვე გადავეცი რუსეთის საპატრიარქოს, რათა მათ არ ჰქონოდათ ეჭვები იმის თაობაზე, ქართველ მეფეებს უნდოდათ თუ არა საქართველოში განსვენება. ახლა პარტიარქმა წაიღო ეს მასალები როგორც ჩანს რუსეთის პრეზიდენტთან სასაუბროდ", - აღნიშნა ღამბაშიძემ.
ამასთან, იგი მოელის, რომ ასტრახანისკენ გზა სწორედ პატრიარქის ვიზიტის შემდეგ გაიხსნება და საკითხის აკადემიურად შესწავლა გაგრძელდება.
სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე მოსკოვში იმყოფება. უწმინდესი 23 იანვარს რუსეთის ფედერაციის პრეზიდენტ ვლადიმერ პუტინთანაც გამართავს შეხვედრას. საქართველოს პატრიარქის საერთაშორისო ფონდის გენერალური მენეჯერის, ლაშა ჟვანიას თქმით, მოსკოვში დაგეგმილ შეხვედრებზე ასევე განიხილება ორი ქართველი მეფის, ვახტანგ მეექვსისა და თეიმურაზ პირველის საქართველოში გადმოსვენების საკითხი.